الغربة
انا راجعلك
وانتي ارجيني
خلي العهد البينا مقدس
اصلي وحاتك وانا في الغربة
في خطواتي انا بيك بتنفس
اوعا توري الناس البينا
في جوانا خلي مدسدس
صاحي غرامك فيني وشارق
واصلو وحاتك يوم مابنعس
**
شائل شوق الكون بي حالو
وليك معبي الروح حنيه
وتاكل قلبي عليك امالو
وفيهو الريده بتنبض حيه
لافي يوم احساسي اتبدل
بحسب في لحظات الجيه
وانتي ارجيني ملانه محنه
افردي جنحات شوقك ليا
**
غيرك مين احتلا كياني
وادي الروح التائهه افراحا
دوزن لي غنواتي محنه
ولاقت بيهو ايامي صباحا
تذكري يوم ودعتك وفتا ؟
وشهدت بي دمعاتنا الساحة
بيك احلامي بشوفا حقيقة
وفيك الروح بي حب سواحة
**
وانا وصيتك اوعا تغيبي
بالاحساس ع طول لاقيني
صبري لي لوعات ايامي
وقشقشي للدمعات في عيني
انتي غيابك قاسي عليا
وباهي حضورك هو البحييني
وبكره اكيد بالشوق بلقاكي
وبالافراح الجد تلقيني
الشاعر عماد المتمة
Pages:
1 2 3 4 5 6 7 8 9 10 11 12 13 14 15
الشاعر عماد المتمة