قصة شهيدة
كلمات : عماد المتمة
عم احمد صحا
بي صوت الاذان
حي علي الفلاح
وكان مليان هموم
وما قادر ينوم
ودابو الفجر لاح
اتوضا ودعا
بي رهبة وخشوع
يارب ياكريم
ياحي يارحيم
ارزقنا اليقين
والهدي والصلاح
هون يا غفور
لي ست النفور
تمشي كما الغمام
في درب النجاح
كانت صاحية هي
نوم ما جاها تب
قالها يا الاميرة
مالك صاحية بدري
ردت بي ادب
البلد البريدا
وشائلة هموما يابا
خانوها العساكر
والشلة العصابة
دمروا كل حاجة
وكتلوا لي شبابا
قالها يابنيتي
الحال مر وشين
والوطن الحبيب زي ادوهو عين
ردت واهة طالعة
من أعماق قليبة
مابنخاف سلاحم
وما ممكن نسيبا
دي البلد الحبيبة
ساكنة الروح معانا
وغامر روحنا طيبة
يابا بلدنا غالية
هي الروح والملاذ
فوق في القمة عالية
موطن ناس عزاز
صاح الكلفة غالية
يوم ماتت ملاذ
وكانت ستنا
محبوبة الجميع
الجار والبعيد
ولي ابوها المني
تخدمو بي محبة
تعمللوا الفطور
بي فرحة وسرور
والشاي المقنن
في المغرب سواء
تجلس في حداهوا
وتديهوا الدواء
كان مشغولة دايما
بي دم الشهيد
ناس كشة ومطر
وود عبد الحميد
والفارس الجسور
اب قلبا حديد
عظمة الكلوا عظمة
محجوب والوليد
شالت لي عفوهو
ومرقت لي المواكب
بي الحرية تهتف
في نص الكواكب
والقناص بعاين
لستو الهمامة
للثوار تحمس
وتهتف بي شهامة
وقعت فجٱة تنزف
وفي خشيمة ابتسامة
كانت طلقة قاتلة
ورحلت زي غمامة
✍عماد المتمة
ألحان و أداء الدكتور : د. إبراهيم عبد الحليم ( إستمع هنا )
