Blog

alarbbab

مشوار ( سوّاح )

سوّاح دخلتَ معاكْ

فى ليل..

صَبى .. و ظالِم

و سرَحتَ فى أحضان ظنِّي الجميل..

واهِم

إنّو البصيبنى معاكْ..

لازِم يكون راحِم..

من أوّل المشوار..

حسّيتْ بأنِّى معاكْ

حفيانَهْ منِّى الروح

و لا مجنون.. و لا سالِم

***

تقدّم سكّتَك مرَّهْ..

تأخِّر سكَّتى ..مرّات

و تظهر فى القمر أشكال..

لإحساس مرَّهْ جانى و فات

أقول يمْكِن سراب باللّيل

أقول جايز نُحول خافِت..

و أدخُل فى ظِلال أنَّات

بقيتْ أحسِب حساب الشوق

و أحِس بالجايى زى الراح

سوّاح دخلتَ معاكْ..

براي ،

أرحَم أكون سوّاح

بدونَك يا حبيب الروح..

بعْرِف أشيل الكون..

فوق راحتين .. و جناح

و أقْدَر أكون مجنون

حتى الزمن لو صاح

سوّاح دخلتَ معاكْ

وفيكْ غلبان .. و بيكْ مُرْتاح

(2)

حأفْتَح فى الجدار تاني

مكان على قَدْرِ أحزانى

أعاين فى جروف الليل

و أكتب فوق سروج الخيل

و بى سعف النخيل

تفصيل

حكايَة فقْدِى عنواني

و أفتَح فى الجدار تاني

مكاناً لى حلم أخضر

و لا شُفْتو .. و لا جانى

الله.. و ليه يا ليل

الله.. و ليه يا ليل

تسافِر موجَهْ شتويَّهْ

تفتِّش فى ضواحي الكون

مراسيهَا النهائيَّهْ

و أفتَح فى الجدار تاني

مكان ما بشيلا أحزاني

الله .. و آه يا نيل

أمامى رِحال..

ورَاي وادي

أحبَّك فى جروف الليل..

ضلامى .. و عُدتى .. و زادى

و أحبَّك تاني..

و تاني ..تاني .. و آتي..

و أفتح فى الجدار تانى

مكاناً لى صباح و ضُحَى

و أرسم فى النهار و أمْحَى

أماني و لا دليل .. لا حيل

و أرسم فوق منابع النيل

شجونى الضاحكَهْ مُنْشرحَهْ

و أحبَّك تانى .. تانى .. و تانى

و أفتح فى الجدار أشواق

مواعيد لى فرح حانى

(3)

وقفتَ على أمل شارِد

و نازِل من شعاع الروح

واقف فوق أمل ناهِد

وقفتَ معاكْ ظلال أشجار

على كل الحَصَل شاهِد

بأنّكْ إنتَ روح الكون

و إنتَُ الماشي والصاعِد

دوام بتلمِّى فى المغبون

و فى المحزون

و فى الغلبو الزمن قاعِد

وقفتَ على أمل مشبوك..

بأطراف الندى

و محبوك..

على غُرَّة جبين نادِر

و فوق صهوَة فرح عامِر

إنتَ الغامِر الغامر

و إنت الآمِر .. الآمِر

و.إنتَ المخفِِِِِي و الظاهِر

و إنتَ فَرَح

جنوني

و منْتَشى و آمِر

يا نجمَة صباح طَلعَتْ

على كون فى الدجى مسافر

إذا كان لُقياك

أنا الربحان و أنا الخاسِر

و يا غيمَة زمان آسِر

إنتَ الفيكْ أصيل مخزون

من بهجَهْ و طلاوَة رُوح

يودِّى الزول مَحَلْ ما يُروح