ضل الضحى
(صالح ود قنعنا)
الشاعر عمر الطيب الدوش
شميس المغرب الممْحوق
تميل فوق وشّك المحْروق
تبين صُفْرَة سنيناتَك
يبين ضُل الكلام مقْلوب
تمِيل يا صالح الأيام
و لا عاشرتَ هِدْماً زين
و لا حتّيت تُراب السوق
تَفضّل..
تفضّل يا حفيف الضُل
و رُش جرجيرَك البايِّت
و عِد ليمونك الفضّل
و كوِّم حُزنك الباير
و بيع من غير تشاوِر زول…
تواريخ دمّك الفاير
و تفرُش فى الضُحَى الأعلى..
تبيع سأم العُمُر كيمان
و لا لافتات
و لا أوزان
لا أتْمَان
تَشِد ترْكَب قفَا الأيام
زَهج خيلَك يِلَد تيمان
فرس شوقَك دوام مسْبوق
تميل يا صالح الأحلام
أهو القدَّامك البتبيعو..
أشواق الصبا الأيتام
و برْضَك ما بْتبيع لى زول
أسف ربيّتُو فوق كتفك
و لا عشقاً شْبِع أوهام
أهى الطاحونَهْ يا صالح
أهو السوق الصبِح ألغام
تفضّل ..يا خفيف الضُل
و رشْرِش صبرَك الناير
و أرفَع صوتَك الحنضل
و ألعن ما يهمّك زول..
أبوك يا سوق ، سليل الغم
أبو الطوريَّهْ و المنجَل
و خال الرّجْلَهْ عم الدنيا جِد الفِجْلَهْ و الفِلْفِل
و شَكْل القُفَهْ و الكرتونَهْ و الجردَل
و ألعَن ما يفوتَك زول
من الشارين من البايعين
و جِنْس البِرضَى و البزَعَل
و أشْتُم ياخى أيه فضّل؟
أيه يحصل؟ و هل تقبل؟
تميل يا صالح النجمات
مع القمر الخصي و أهبَل
مِتين يا صالح الآمال
تميل ترقُص و تِتْعدَّل
و أضحك لا يشيلك هم
على النيل الصبح مَبْول
صَحِي الأمواج بتتْبهدَل
(صحِي الأمواج بتِتْبدَل؟)
و برضو سُعاد حتتْحوّل؟
لا يُمْكِن
دى شمس الضُحى الأعلى
و مشيَهْ حنينَهْ تحت الضُل
و تكْيَهْ طريَهْ فوق رملَهْ
دى أحلام جاريَهْ مُنْبهْلَهْ
و ما مًمْكن تقيف إلاّ
وليد العُمدهْ يلْعَب بي
يدرْدِق فى الحرير كرْشو
يعاين فى النِّعال وَشِّو
و يقْدِل فى الفريق تمساح
ينادى سُعاد
تَلِم الكون تحت ضُل الضُحى البوّاح
تصوّر يا خفيف الضُل
دا عِندو الهمسَهْ عِندو الغمْزَهْ عندو اللمْسَهْ
أمر مُبَاح
و نقْطَع من لحمْنَا الحي
و نقْعُد فوق شحمْنا السَّاح
و نهتف نحنا مشويّين و مقليّين
دَا يا عُمدتنا ياهو الصاح
و ياهو الصاح
و ياهو الصاح
أيا عِزَّة نَفِس برَكَت
متين بتسِّوى لينا جناح
و أشيلك يا سعاد و أمْرُق
من الزمن الدّنى و نبّاح
و أشيلك يا سعاد و أمرق
من الزمن الدنى و نباح
و العمدهْ صاح
يا ولد
يا إنتَ يا صالح
تعال شِد الحُمار
و أنْدَه سُعاد
شِد الحُمار و أندَه سُعاد
ده قليل على يا عُمدة فى هذا الصباح
و العمدهْ صاح
أندَه سُ ع اد ..شِد ال حُ م ار
وا فرحَة الحُب المطرّز بالمراسيل
و الغُبار
يا دَه السَماح
دَه كتير عليْ يا عُمدهْ فى هذا الصباح
شِد الحمار و أنده سعاد
يا فرحتك يا ود قِنِعْنَا
ما بِهِم شَدْ الحُمار
إذا نهايتو تشوف سُعاد
يا ده السَماح
أدّينى بس يا عُمدهْ بس
يومين صباح
و غروب طويــــــل
أقْدَر ألمِلْم فيها عفَش الروح
و أشد عصب المسافَهْ
الواقفَهْ
بينى و بين سعاد
أدُق يا عُمدهْ بينى و بين حِماك
أوتاد
و أرقُد فى ضواحى السُوق
و أحلَم و العمر مشنوق
تجينى بلاد
أبيع فيها الفَضَل من شوق
تطوفْنى بلاد
أغيِّر فيها شكل القُفَهْ
و الأسياد
و أدِّينى بس يا عمدَهْ بس
يومين نهار مع ليل طويل
أقْدَر أغيِّر فيها طعم البوح
و أقولِك يا سُعاد
سُعاد ليمون
سُعاد نعْناع
حكايَة ليل
على درب الهوى الضَيّاع
سُعاد ميعاد
مجاعَهْ و زاد
على درْب الهوى الجوَّاع
و أقولِك يا سعاد
"يا دَه السماح
أيا عِزَة نِفس برَكَت
متين بنْسوِّى لينا جناح
و أشيِلك يا سُعاد
و أمْرُق
من الزمن الدَّني و نباح
