مرسى النجوم
الشاعر عمر الطيب الدوش
و جيت يا حلوه زي زولا قضي الأيام
بكا ،، و منفى
و جيتك من بلاد باتت علي
نار زيفها ،، تتدفأ
أنا المسجون زمن يا حلوه
فيها مداين الكلفه
و لاقيتك ،،،
سلام عينيك
رماني علي سلام ،، و صفا
أمانا فيكي فتح لي
علي مرسي النجوم شرفه
و لاقيتك ،،،
همومك من هموم الغير
و في حال البلد ،، و الريف
و في النايمين علي الأحزان
و في الصاحيين ،، مآسي و خوف
في التايهين مع الأشواق
متين تنزاح سموم الصيف
و لاقيتك ،،،
غصنا مال علي الأمواج
و هفهف فوق خضرة القيف
أحبك بي مشاعر جيل ،،
رفع للشمس راية ،، و سيف
و ثبت في الأرض أقدامو
و في أعماق تراب الريف